18.september 2023

Mikilvæg tímamót

Ég var að biðja í morgun og eftir að ég var búin að deila hjarta mínu með Guði. Þá beið ég hljóður og beindi sjónum mínum til Drottins. Mér fannst talað til mín, “Horfðu á Ísrael, horfðu á Ísrael, ég er að fara að hefjast handa. Tíminn er í nánd“. Ég hef alltaf haft auga á Ísrael og Jerúsalem, því ég þjóna og trúi á Guð Ísraels. Hann heitir Yeshua (Jesús) og samkvæmt ritningunum, þá mun hann koma aftur og ríkja í Jerúsalem með járnsprota í þúsundáraríkinu.

Ég hef lesið mig til um og tekið eftir því að þegar eitthvað stórt gerist í Ísrael, þá hefur það einnig áhrif á líkama Jesú Krists. Þegar Ísrael varð aftur þjóð og endurheimti hluta af Jerúsalem 1948-1949, hófst á sama tíma lækningavakningin mikla í Bandaríkjunum. Einnig sjáum við þegar Ísrael endurheimti alla Jerúsalem eftir sex daga stríðið árið 1968 (að undanskilinni musterishæðinni) hófst náðargjafavakningin í kirkjunni og Jesú hreyfingin.

Það er í raun yfirnáttúrulegt að Ísrael sem er eitt öflugasta ríki heimsins með gríðarlega öflugt vopnabúr og tækni sé ekki búið að yfirtaka musterishæðina. En það er ástæða fyrir því. Tíminn var ekki komin fyrir endurbyggingu musterisins, ritningarnar rætast á réttum tíma. Ég trúi að Guð sé að segja núna, “Horfið á Ísrael, ég er að fara að hefjast handa!“

Tími heiðingjanna er að renna út en ég trúi að þegar við sjáum Ísrael taka yfir musterishæðina og hefja framkvæmdir við þriðja musterið sé mjög stutt í lokavakningu heiðingjanna sem mun standa stutt yfir. Eftir það tekur við 11. kafli Opinberunarbókarinnar, þar mun Guð snúa sér aftur að Ísrael um stutta stund og senda vottana sína tvo áður en formleg endurkoma Drottins á sér stað, við skoðum þetta betur neðar í þessari grein.

Rómverjabréfið 11:25-26

Ég vil ekki, bræður mínir, að yður sé ókunnugt um þennan leyndardóm, til þess að þér skuluð ekki með sjálfum yður ætla yður hyggna. Forherðing er komin yfir nokkurn hluta af Ísrael og varir þangað til heiðingjarnir eru allir komnir inn. -26- Og þannig mun allur Ísrael frelsaður verða, eins og ritað er: Frá Síon mun frelsarinn koma og útrýma guðleysi frá Jakob.

Takið eftir að Jóhannes er beðin um að mæla musterið. Það er nánast allt klárt nú þegar í Ísrael, rauðu kvígurnar eru komnar til Ísrael, það er búið að búa til öll musterisáhöldin, Levítarnir eru til staðar og tilbúnir til þjónustu.

Opinberunarbókin 11:1-2

Mér var fenginn reyrleggur, líkur staf, og sagt var: Rís upp og mæl musteri Guðs og altarið og teldu þá, sem þar tilbiðja. -2- Og láttu forgarðinn, sem er fyrir utan musterið, vera fyrir utan og mæl hann ekki, því að hann er fenginn heiðingjunum, og þeir munu fótum troða borgina helgu í fjörutíu og tvo mánuði.

Ég trúi að við séum á miklum tímamótum. Við erum núna þegar þetta er skrifað þann 17.sept 2023 á hausthátíðum Drottins. Rosh Hashanah (Lúðrahátíðin) var í gær, næst er Yom Kippur (Friðþæginardagurinn) og svo Sukkot (Laufskálahátíðin).

Af hverju er ég að tala um þessar hátíðir, af hverju eru þær mikilvægar?

Eins og Jesús uppfyllti vorhátíðirnar á undursamlega og nákvæman hátt þegar hann kom í fyrra skiptið gefur það mér fullvissu um að hann muni uppfylla hausthátíðirnar einnig á undursamlegan hátt við seinni komu sína.

Það er til eftirbreytni að skoða hefðir gyðinga varðandi þessar hátíðir. Þeir undirbúa sig vel fyrir bæði vorhátíðirnar sem og hausthátíðirnar. Þeir iðrast, helga sig, hreinsa út súrdeig sem einnig er hægt að kalla skurðgoð eða synd. Þetta gera þeir dögum saman áður en hátíðirnar hefjast til að undirbúa hjarta sitt og staðsetja sig til að taka á móti blessunum Drottins. Það er einmitt það sem Guð hefur verið að hvetja mig til að gera undanfarið með sterkari hætti en áður. Hann hefur kallað mig í tíðari föstur og sýnt mér hvað það er sem ég hef þurft að losa mig við eða hreinsa út fyrir því sem framundan er.

Við erum á mikilvægum tímamótum núna á þessu hausthátíðum Drottins 2023 og ég vil hvetja þig til að leita Drottins af öllu hjarta og biðja hann um að sýna þér hvort það sé eitthvað í þínu lífi sem þú þarft að losa þig við. Má þá nefna þessa helstu hluti sem flestir eru að eiga við í dag. Hvor fær meiri tíma Guð eða síminn, Guð eða sjónvarpið, Guð eða áhugamálið. Það getur einnig verið fyrirgefningarleysi og margt annað sem við gætum þurft að gera upp og nú er tíminn til að snúa til baka til hreinnar trúar og leggja allt okkar líf við fætur Jesú.

Jósúabók 24:15

En líki yður ekki að þjóna Drottni, kjósið þá í dag, hverjum þér viljið þjóna, hvort heldur guðum þeim, er feður yðar þjónuðu, þeir er bjuggu fyrir handan Fljótið, eða guðum Amoríta, hverra land þér nú byggið. En ég og mínir ættmenn munum þjóna Drottni.

Tíminn er að renna út

Ég heyrði Drottinn segja í morgun, “tíminn er í nánd”. Miðað við það sem er að gerast í heimum í dag og þær breytingar sem hafa orðið síðustu 15 ár er það augljóst í mínum huga hvar við erum stödd. Það er aðeins fyrir náð Guðs að maður sé yfir höfuð á lífi, en munum að engin veit sinn lokadag. Vertu viss um að þú sért tilbúin að mæta skapara þínum.

Opinberunarbókin 22:10-12

Og hann segir við mig: Innsigla þú ekki spádómsorð þessarar bókar, því að tíminn er í nánd. -11- Hinn rangláti haldi áfram að fremja ranglæti og hinn saurugi saurgi sig áfram og hinn réttláti stundi áfram réttlæti og hinn heilagi helgist áfram. -12- Sjá, ég kem skjótt, og launin hef ég með mér, til að gjalda hverjum og einum eins og verk hans er.

Hausthátíðir Drottins

Mig langar að fara í gegnum þessar þrjár hausthátíðir og útskýra hina spámannlegu uppfyllingu þeirra tengt endurkomu Jesú. Jesús uppfyllti vorhátíðirnar á einstakan og mjög nákvæman hátt eftir þeim fyrirmyndum sem hann hafði gefið Ísraelsmönnum í fyrri sáttmálanum eða Mósebókunum og þið getið lesið um að hluta til með því að smella hér fyrir neðan.

Yom Teruah / Rosh Hashanah / Lúðrahátíðin

Þriðja Mósebók 23:23-25

Drottinn talaði við Móse og sagði: -24- Tala þú til Ísraelsmanna og seg: Í sjöunda mánuðinum, hinn fyrsta dag mánaðarins, skuluð þér halda helgihvíld, minningardag með básúnublæstri, helga samkomu.

Það sem er áhugavert við þessa hátíð er að hún er haldin sem upphafið af “nýju ári” hjá Ísraelsmönnum þótt hún sé í sjöunda mánuðinum. Þar sem þessi hvíldardagur eða helgihvíld er upphafið af hausthátíðunum og er álitinn mjög mikilvægur, festi hann sér í sessi sem, “Hið andlega nýja ár”. Hátíðin heitir Yom Teruah í ritningunum og þýðir Lúðrahátíðin.

Tilgangur þessar hátíðar að endurvekja og safna okkur saman til hreinnar trúar á Guð. Þessi dagur er í raun dagur iðrunar. Dagur þar sem við gerum upp það sem er að baki og undirbúum okkur fyrir það sem hausthátíðirnar tákna og standa fyrir. Þessi dagur skipar slíkan sess að allur mánuðurinn “Elul” sem kemur á undan fær sérstaka merkingu og er álitinn sérstakur 40 daga andlegur undirbúningur frá 1. Elul og fram að Yom Kippur sem ég fer í hér á eftir.

Margir hafa velt fyrir sér tengingunni á þessum degi endurvakningar og hvernig Jesús kom til að endurfæða og safna okkur saman í einn mann í sér, bæði gyðingum og heiðingjum. Hefðbundin hátíðarhöld á þessum degi hjá gyðingum er að blása í lúður eða básúnu eins og ritningarnar nefna í Þriðju Mósebók. Það er margt sem bendir til að Jesús hafi fæðst á hausthátíðunum og því má leiða að því líkur að skírn Jesú og þjónusta hans hafi hafist við 30 ára aldur að hausti og áhugavert í ljósi þess að þá var að hefjast “Hið andlega nýja ár (Spritual New Year)” eða Rosh Hashanah. Við munum einmitt að þegar Jesús var skýrður þá leiddi andinn hann út í óbyggðina þar sem hann fastaði í 40 daga, áður en hann hóf formlega þjónustu sína. Þannig að líklegt má teljast að Jesús hafi einmitt farið út í óbyggðirnar í kringum 1. Elul til að undirbúa sig með föstu og bæn í 40 daga, líkt og Ísraelsmenn höfðu gert í gegnum aldirnar.

Það er einnig hægt að sjá Rosh Hashanah (Lúðrahátíðina) uppfyllast að fullu við endurkomu Jesú Krists, þegar hann mun stíga niður með kalli, höfuðengilsraust og með básúnu Guðs til að safna saman öllum þeim sem tilheyra honum.

Fyrra Þessaloníkubréf 4:16-18

Því að sjálfur Drottinn mun stíga niður af himni með kalli, með höfuðengils raust og með básúnu Guðs, og þeir, sem dánir eru í trú á Krist, munu fyrst upp rísa. -17- Síðan munum vér, sem eftir lifum, verða ásamt þeim hrifnir burt í skýjum til fundar við Drottin í loftinu. Og síðan munum vér vera með Drottni alla tíma. -18- Uppörvið því hver annan með þessum orðum

Jesaja 27:12-13

Á þeim degi mun Drottinn slá kornið úr axinu, allt í frá straumi Efrats til Egyptalandsár, og þér munuð saman tíndir verða einn og einn, Ísraelsmenn! -13- Á þeim degi mun blásið verða í mikinn lúður, og þá munu þeir koma, hinir töpuðu í Assýríu og hinir burtreknu í Egyptalandi, og þeir munu tilbiðja Drottin á fjallinu helga í Jerúsalem.

Matteusarguðspjall 24:31

Hann mun senda út engla sína með hvellum lúðri, og þeir munu safna hans útvöldu úr áttunum fjórum, himinskauta milli.

Það er skýr tenging á milli Rosh Hashanah og endurkomu Jesú Krist, þess vegna er gott að undirbúa sig á þessum tíma hausthátíðanna og snúa til baka til hreinnar trúar, þar sem við erum laus við meðvitund um synd og að það sé ekkert í hjarta okkar sem dæmir okkur.

Yom Kippur / Friðþægingardagurinn

Þriðja Mósebók 23:26-32

Drottinn talaði við Móse og sagði: -27- Tíunda dag þessa hins sjöunda mánaðar er friðþægingardagurinn. Skuluð þér þá halda helga samkomu og fasta og færa Drottni eldfórn. -28- Þennan sama dag skuluð þér ekkert verk vinna, því að hann er friðþægingardagur, til þess að friðþægja fyrir yður frammi fyrir Drottni Guði yðar. -29- Því að hver sá, er eigi fastar þennan dag, skal upprættur verða úr þjóð sinni. -30- Og hvern þann, er eitthvert verk vinnur þennan dag, hann vil ég afmá úr þjóð hans. -31- Þér skuluð ekkert verk vinna. Það er ævarandi lögmál fyrir yður frá kyni til kyns í öllum bústöðum yðar. -32- Það skal vera yður helgihvíld og þér skuluð fasta. Hinn níunda dag mánaðarins að kveldi, frá aftni til aftans, skuluð þér halda hvíldardag yðar.

Yom kippur hefur lengi verið talin heilagasti dagurinn í biblíulega dagatalinu. Það var á þessum degi, hvert ár, að æðsti presturinn fór inn í hið allra helgasta til að friðþægja fyrir syndir þjóðarinnar. Það á einnig einstaklega vel við að tíu dögum fyrr eða á Rosh Hashanah var dagur iðrunar og undirbúnings fyrir sjálfan friðþægingardaginn. Hægt er að lesa nánar um sláturfórninar sem framkvæmdar voru á þessum degi í 16. kaflanum á Þriðju Mósebók. En í stuttu máli þá voru tveir geithafrar leiddir fram fyrir Drottinn og með hlutkesti var valið hverjum ætti að slátra í syndafórn og hver ætti að lifa og bera syndir lýðsins út fyrir tjaldbúðina. Þetta minnir mig á þegar valið var á milli Jesú og Barabbasar rétt fyrir krossfestinguna, Barababbas syndum hlaðinn fékk að halda lífi á meðan Jesús varð hin fullkomna syndafórn.

Þriðja Mósebók 16:

Þá skal hann taka báða geithafrana og færa þá fram fyrir Drottin að dyrum samfundatjaldsins. -8- Og Aron skal leggja hluti á báða hafrana, einn hlut fyrir Drottin og hinn annan hlut fyrir Asasel. -9- Og Aron skal leiða fram hafurinn, sem hlutur Drottins féll á, og fórna honum í syndafórn. -10- En hafurinn, sem hlutur Asasels féll á, skal færa lifandi fram fyrir Drottin, til þess að friðþæging fari fram yfir honum og honum sé sleppt til Asasels út á eyðimörkina.

Ég trúi að endurbygging musterisins sé handan við hornið. Það mun eitthvað stórt þurfa að gerast til þess að stjórn Ísraels taki af skarið og yfirtaki musterishæðina, en ég sé vísbendingar um að það sé í bígerð og má þar nefna nýlega mjög umdeilda löggjöf sem dró verulega úr völdum hæstaréttar í Ísrael og gaf Benjamín Netanyahu og stjórn hans, sem er að stórum hluta skipuð strangtrúuðum gyðingum, yfirburðavald til að taka slíka ákvörðun. Þetta þýðir að öllu óbreyttu við endurreisn musterisins að fórnir myndu hefjast að nýju. Þannig myndi Jesús því einnig uppfylla Yom Kippur að fullu við endurkomu sína þegar að gyðingarnir sem voru blindaðir okkar vegna sjá hann sem hina fullkomnu syndafórn. Opinberun sem við höfum þegar tekið á móti í Kristi.

Hebreabréfið 10:12-18

En Jesús bar fram eina fórn fyrir syndirnar og settist um aldur við hægri hönd Guðs -13- og bíður þess síðan, að óvinir hans verði gjörðir að fótskör hans. -14- Því að með einni fórn hefur hann um aldur fullkomnað þá, er helgaðir verða. -15- Og einnig heilagur andi vitnar fyrir oss. Fyrst segir hann: -16- Þetta er sáttmálinn, er ég mun gjöra við þá eftir þá daga, segir Drottinn. Lög mín vil ég leggja í hjörtu þeirra, og í hugskot þeirra vil ég rita þau. -17- Síðan segir hann: Ég mun aldrei framar minnast synda þeirra eða lögmálsbrota. -18- En þar sem syndirnar eru fyrirgefnar, þar þarf ekki framar fórn fyrir synd.

Sukkot / Laufskálahátíðin

Þriðja Mósebók 23:33-44

Drottinn talaði við Móse og sagði: -34- Tala þú til Ísraelsmanna og seg: Á fimmtánda degi þessa hins sjöunda mánaðar skal halda Drottni laufskálahátíð sjö daga. -35- Fyrsta daginn skal vera helg samkoma, þá skuluð þér eigi vinna neina stritvinnu. -36- Sjö daga skuluð þér færa Drottni eldfórn. Áttunda daginn skuluð þér halda helga samkomu og færa Drottni eldfórn. Það er hátíðafundur, þá skuluð þér eigi vinna neina stritvinnu. -37- Þetta eru löghátíðir Drottins, er þér skuluð boða sem helgar samkomur til þess að færa Drottni eldfórn, brennifórn og matfórn, sláturfórn og dreypifórnir, hverja fórn á sínum degi, -38- auk hvíldardaga Drottins og auk gjafa yðar og auk allra heitfórna yðar og auk allra sjálfviljafórna yðar, er þér færið Drottni. -39- Á fimmtánda degi hins sjöunda mánaðar, er þér hafið hirt gróður landsins, skuluð þér halda hátíð Drottins sjö daga. Fyrsta daginn skal vera helgihvíld og áttunda daginn skal vera helgihvíld. -40- Og fyrsta daginn skuluð þér taka yður aldin af fögrum trjám, pálmviðargreinar og lim af þéttlaufguðum trjám og lækjarpíl, og þér skuluð fagna frammi fyrir Drottni, Guði yðar, í sjö daga. -41- Og þér skuluð halda hana helga sem hátíð Drottins sjö daga á ári. Það er ævarandi lögmál fyrir yður frá kyni til kyns: Í sjöunda mánuðinum skuluð þér halda hana. -42- Skuluð þér búa í laufskálum sjö daga. Allir innbornir menn í Ísrael skulu þá búa í laufskálum, -43- svo að niðjar yðar viti, að ég lét Ísraelsmenn búa í laufskálum, þá er ég leiddi þá út af Egyptalandi. Ég er Drottinn, Guð yðar. -44- Og Móse sagði Ísraelsmönnum löghátíðir Drottins.

Laufskálahátíðin er síðasta hausthátíðin og þar með ein sú mikilvægasta fyrir þá tíma sem við lifum á, því við bíðum þess að hún verði uppfyllt að fullu. Til að skilja betur hversu merkileg þessi hátíð er þurfum við að skoða söguna og hvernig Sukkot hefur verið haldin hátíðleg í gegnum aldirnar. Þetta er uppskeruhátíð þar sem Ísraelsmenn komu saman og fórnuðu til Drottins eftir að hafa hirt gróður landsins eða haust uppskeruna. Það er einnig hægt að segja að þetta sé þakkarhátíð þar sem Guði var þakkað fyrir hans forsjá og blessanir. Það eru margir sem trúa að Púritanar sem voru miklir fræðimenn í hebresku ritningunum hafi út frá Laufskálahátíðinni, stofnað “Thanksgiving” eða þakkargjörðarhátíðina sem haldin er hátíðleg í Bandaríkjunum og fleiri löndum.

Ef við skoðum betur nafnið á hátíðinni þá heitir hún Laufskálahátíðin og leiðbeiningarnar í Þriðju Mósebók eru að Ísraelsmenn áttu að búa í laufskálum í 7 daga, líkt og þeir höfðu gert í eyðimörkinni, til minningar um að Guð leiddi þá út úr Egyptalandi. Þetta á sér dýpri opinberun sem enn á eftir að ganga í uppfyllingu að fullu. Ísraelsmenn enn þann dag í dag gera laufskála á þessari hátíð og minnast þess þegar Guð dvaldi á meðal þeirra í eyðimörkinni.

Það eru góðar vísbendingar um að Jesús hafi einmitt fæðst á Laufskálahátíðinni en ekki 25.desember líkt og margir vilja meina. Hvert er tákn þessarar hátíðar? Er það ekki einmitt, Guð á meðal okkar til að frelsa, líkt og hann gerði á tímum Móse. Þannig uppfyllti Jesús að hluta þessa hátíð með fyrri komu sinni í holdi.

Jóhannesarguðspjall 1:14

Og Orðið varð hold, hann bjó með oss, fullur náðar og sannleika, og vér sáum dýrð hans, dýrð, sem sonurinn eini á frá föðurnum.

Fullkomin uppfylling Sukkot er í senn andleg og bókstafleg uppfylling. Við vitum að þegar Jesús kemur aftur mun hann búa meðal okkar í þúsund ár og ríkja með járnsprota í Jerúsalem, ásamt sínum heilögu.

Jesaja 2:3

Og margar þjóðir munu búast til ferðar og segja: Komið, förum upp á fjall Drottins, til húss Jakobs Guðs, svo að hann kenni oss sína vegu og vér megum ganga á hans stigum, því að frá Síon mun kenning út ganga og orð Drottins frá Jerúsalem.

Opinberunarbókin 19:11-16

Þá sá ég himininn opinn, og sjá: Hvítur hestur. Sá, sem á honum sat, heitir Trúr og Sannur, hann dæmir og berst með réttvísi. -12- Augu hans eru sem eldslogi og á höfði hans eru mörg ennisdjásn. Og hann ber nafn ritað, sem enginn þekkir nema hann sjálfur. -13- Hann er skrýddur skikkju, blóði drifinni, og nafn hans er: Orðið Guðs. -14- Og hersveitirnar, sem á himni eru, fylgdu honum á hvítum hestum, klæddar hvítu og hreinu líni. -15- Og af munni hans gengur út biturt sverð að slá þjóðirnar með, og hann stjórnar þeim með járnsprota. Og hann treður vínþröng heiftarreiði Guðs hins alvalda. -16- Og á skikkju sinni og lend sinni hefur hann ritað nafn: Konungur konunga og Drottinn drottna.

Ég trúi að áður en hin bókstaflega fullkomna uppfylling á sér stað muni Guð uppfylla Sukkot á andlegan hátt þegar hann mun verða eitt með brúði sinni hér á jörðinni og við munum sjá lokavakningu Drottins flæða yfir jörðina í stuttu lokaverki áður en allt kemur fram. Ég mun skrifa ítarlega grein um sjálfa Laufskálahátíðina síðar og þær vísbendingar sem við höfum í Orðinu um þessa lokavakningu, hvernig tími þjónustu Jesú á tímum krossfestingarinnar tengist spádómum Daníelsbókar, síðustu tímum og fleira, en það er alveg heil grein út af fyrir sig.

Opinberunarbókin 19:7-9

Gleðjumst og fögnum og gefum honum dýrðina, því að komið er að brúðkaupi lambsins og brúður hans hefur búið sig. -8- Henni var fengið skínandi og hreint lín til að skrýðast í. Línið er réttlætisverk heilagra. -9- Og hann segir við mig: Rita þú: Sælir eru þeir, sem boðnir eru í brúðkaupsveislu lambsins. Og hann segir við mig: Þetta eru hin sönnu orð Guðs.

Opinberunarbókin 21:1-3

Og ég sá nýjan himin og nýja jörð, því að hinn fyrri himinn og hin fyrri jörð voru horfin og hafið er ekki framar til. -2- Og ég sá borgina helgu, nýja Jerúsalem, stíga niður af himni frá Guði, búna sem brúði, er skartar fyrir manni sínum. -3- Og ég heyrði raust mikla frá hásætinu, er sagði: Sjá, tjaldbúð Guðs er meðal mannanna og hann mun búa hjá þeim, og þeir munu vera fólk hans og Guð sjálfur mun vera hjá þeim, Guð þeirra.

Guð blessi þig!

Hvað er svona merkilegt við þessa dagsetningu ?

Áður en ég fer yfir söguna og það sem Biblían segir varðandi þetta tímabil skulum við lista upp þá atburði sem átt hafa sér stað þann 9 Av í gyðinglega dagatalinu.

9 Av

• 1200 B.C.– Guð sagði Ísraelsmönnun í eyðimörkinni að þessi kynslóð myndi ekki komast inn í fyrirheitna landið.
• 586 B.C – Babýlonski herinn eyðilagði heilaga musterið.
• 70 A.D. – Títus og rómverski herinn eyðilögðu heilaga musterið
• 135 A.D. – „Bethar“, vígi Bar Kochba, féll og gerði út um vonir gyðinga um sjálfstæði.
• 136 A.D. – Róm byrjaði að reisa heiðnu borgina á staðnum þar sem musterið var vígt.
• 1096 A.D. – Fyrstu krossferðirnar hófust.
• 1290 A.D. – Gyðingum var vísað frá Englandi.
• 1306 A.D. – Gyðingum var vísað frá Frakklandi.
• 1492 A.D. – Ferdinand konungur og Ísabella drottning undirrituðu brottvísun. Í júlí, þann 9. Av, þurftu allir gyðingar að vera komnir frá Spáni.
• 1648 A.D. – Chmelnicky myrti tugþúsundir pólskra gyðinga.
• 1914 A.D. – Yfirlýsingar varðandi Fyrri heimstyrjöldina gengu út.
• 1942 A.D. – Áætlanir um gereyðingu gyðinga voru gerðar í síðari heimstyrjöldinni.

Það er afar áhugavert að svona risastórir sögulegir atburðir varðandi Ísraelsmenn skuli allir hitta á sömu dagsetninguna. Þetta er í raun þriggja vikna tímabil sem byrjar þann 17 í Tammuz mánuði og nær hámarki þremur vikum síðar þann 9 Av. Í bæði skiptin þar sem ráðist var á Jerúsalem og musterin eyðilögð höfust þann 17 Tammuz og enduði þann 9 Av. Þetta er sorgartímabil en þann dag í dag í Ísrael og einnig tími föstu, bæna og jafnvel ótta um að eitthvað alvarlegt geti gerst. Þetta tímabil hefur verið kallað nokkrum nöfnum eins og “Dire Straits” eins og kemur fram í Harmljóðunum, en einnig “Season of the Basilisk”, þar sem eðli þessara ofsókna er með þeim hætti að óvinurinn virðist hafa sérstakt vald eða leyfi til að herja á Ísrael.

Harmljóðin 1:3

Júda hefir flúið land fyrir eymd og fyrir mikilli ánauð. Hann býr meðal heiðingjanna, finnur engan hvíldarstað. Allir ofsækjendur hans náðu honum í þrengslunum.

“Judah has gone into captivity, under affliction and hard servitude; she dwells among the nations, she finds no rest; all her persecutors overtake her in dire straits.”

Ég ætla ekki að fara mjög djúpt í kennslu um nöðruna eða “basilisk”, en það er talað sérstaklega um þennan djöful á nokkrum stöðum í Biblíunni.

Jeremía 8:17

Sjá, ég sendi meðal yðar höggorma, nöðrur, sem særingar vinna ekki á, og þeir skulu bíta yður segir Drottinn.

For, behold, I will send serpents, basilisks, among you which will not be charmed, and they shall bite you, saith the Lord. (Jeremiah 8:17)

Hér er brot úr sýn sem Bob Jones fékk varðandi Nöðruna og þetta þriggja vikna tímabil sem hefur valdið svo miklum hörmungum fyrir gyðinga í gegnum tíðina.

“Þann 23. júlí 1996 og aftur 23. júlí 1997 var Bob gefin sýn frá Drottni sem sýndi þennan kraftmikla djöfullega anda sem Hann þráir að við skiljum og stöndum gegn. Það var ljóst í sýnunum að þessi andi bjóst ekki við að verða afhjúpaður né opinberaður. Þessi illi andi er vanur að starfa í leyni án þess að vera uppgötvaður eða hindraður. Þessi mikli óvinur krossins hefur vald til að losa um víðtæka eyðileggingu og eymd á jörðinni, sérstaklega ef hin biðjandi kirkja stendur ekki gegn honum. Þessi illi andi er þekktur sem Basilisk.

Basilisk er myndlíking djöfulsins sjálfs sem hefur þann aðaltilgang að koma með dauða og eyðileggingu. Hefðbundinn dauðsföll sem stafa af þessum anda eru sprottinn af plágum, veikindum og sjúkdómum, náttúruhamförum og jafnvel hryðjuverkum. Uppruna þess má rekja allt aftur til Ísraels til forna. Egyptar tilbáðu þennan anda sem „drottinn og konung höggormanna sem allir áttu að óttast, og var sterkari en allir“. Þeir sýndu krýndan basilisk á höfði guða sinna eins og sést á Bembine-töflunni og öðrum egypskum minnismerkjum. Þetta sýnir tilraun Satans til að lyfta sjálfum sér yfir Guð sem hlut tilbeiðslu.”

Hér er hægt að lesa ítarlega kennslu og alla sýnina sem Bob Jones fékk.

17 Tammuz

Við skulum einnig skoða þá atburði sem marka upphaf þessa þriggja vikna tímabil eða sem hófust þann 17 Tammuz.

• 1312 BC. – Móse steig niður af Sínaífjalli eftir 40 daga og sá fólkið tilbiðja gullkálfinn. Móse braut töflurnar tvær sem innihéldu boðorðin tíu. 3.000 Ísraelsmenn voru drepnir af levítum.
• 2 Kings 21:7. – Hinn illi konungur Manasse í Júda lét setja upp asérulíkneski í musterinu.
• 586 BC. – Múrar Jerúsalem brustu eftir margra mánaða umsátur Nebúkadnesars og babýlonskra herafla hans (Fyrsta musteri var eyðilagt 3 vikum síðar á 9 Av. )
• 70 AD. – Titus & Rómverjar brutu múra Jerúsalem. Upphaf endaloka annars musterisins, sem var eyðilagt þremur vikum síðar á 9 Av. )
•  135 AD. – Annað stríð gyðinga og Rómverja. Rómverski herforinginn Apostomus brenndi Torah-rit fyrir uppreisn Bar Kokba.
• 1239 – Gregoríus páfi IX fyrirskipaði að öll handrit Talmúdsins yrðu gerð upptæk.
• 1391 – Meira en 4.000 spænskir ​​gyðingar voru drepnir í Toledo og Jaen á Spáni.
•  1559 – Gyðingahverfið í Prag var brennt og rænt.
• 1944 – Allir íbúar gettósins í Kovno voru sendir í dauðabúðirnar.
• 1970 – Líbýa fyrirskipaði að allar eignir gyðinga yrðu gerðar upptækar.
• 1981 – Ísraelar réðust á Tammuz-1 kjarnaofninn í Osiraq til að reyna að koma í veg fyrir kjarnorkuáætlun Íraks.
• 1994 – Shoemaker Levi reikistjarnan byrjaði að brotna upp og endaði með því að sprengja Júpíter með 16 brotum á 9 Av, þar sem hvert brot jafngilti höggi frá kjarnorkusprengju
•  Tammuz 24, 2002 – Einni viku eftir 17. Tammuz föstuna, byrjaði vatn að streyma út úr Vesturmúrnum. Einn steinninn, 15 metrum uppi í veggnum, verður allt í einu rennandi blautur án jarðneskra skýringa.
• 2006 – Líbanon og Ísrael fóru í stríð eftir að Hezbollah rændi 2 ísraelskum hermönnum. (Chuck Pierce spáði 29. janúar 2006, “horfðu á Líbanon. Ég mun koma átökum inn í Líbanon, því það eru mörkin sem ég mun takast á við á þessu ári varðandi fyrirheitna landið mitt Ísrael. Hernaðarættkvíslir Líbanons munu aftur rísa upp. En ég mun vinna þetta stríð, og auðæfum sem hafa verið tekin mun verða skilað í mitt ríki.”)

Það hefur verið nokkuð rólegt í Ísrael undanfarin ár, þótt það hafi einhver átök átt sér stað inn á milli. En spennan er að magnast og það virðist margt benda til þess að að alvöru stríð sé í vændum. Við þurfum að biðja fyrir Ísrael því við tilheyrum konungi Ísraels sem mun koma einn daginn og ríkja í Jerúsalem ásamt sínum heilögu.

Í dag er 9 Av

Þegar þessi grein er skrifuð er einmitt 9 Av og það eru mjög athyglisverðir hlutir að eiga sér stað í Ísrael, það hafa verið gríðarlega fjölmenn mótmæli undanfarið þar Benjamin Netanyahu og ríkisstjórn hans (sem er skipuð af stórum hluta af strangtrúuðum gyðingum) er búin að taka mjög róttæk skref í að breyta löggjöf, sem dregur verulega úr völdum hæstarétti landsins og eykur völd þingsins. Gæti verið að þetta séu skrefin sem þarf að taka í undirbúningi fyrir endurbyggingu musterisins í Ísrael ?

Hér er grein sem fjallar um þessi mál.

Hér er svo brot úr grein dagsins á www.haaretz.com

“Now, after the law’s passing, Herzog is focusing his frustration and anxiety on the possibility of a civil war and on the coalition’s rejection of his efforts to modify the legislation. “I get up in the morning with deep frustration and a bad feeling of crisis. I, too, am in emotional turmoil. I am pained, and I am angered,” he wrote. “I pleaded for listening, for an extended hand, and for taking responsibility.”

Guð blessi þig!

Gervigreind

Ég ætla að byrja þessa grein á að fjalla um efni sem ég er búin að vera að rannsaka síðustu mánuði. Gervigreind eða Ai er byltingarkennd tækni sem háttsettir aðilar í tækniheiminum eru farnir að vara við og hvetja stjórnvöld að hægja á eða stöðva um sinn. Þróunin er slík að fólk hefur áhyggjur að hún geti hreinlega leitt yfir okkur aðstæður sem ómögulegt væri að vinda ofan af eða stöðva. Þessi tækni hefur gríðarlega mikla möguleika til góðs og nú þegar er verið að nýta hana til þess að greina ákveðnar tegundir af krabbameini löngu fyrr en áður hefur verið hægt, hún hefur fordæmalausa reikni og greiningargetu og getur því einfaldað nánast alla verkþætti í nútímasamfélagi. Flest höfum við heyrt af Chat GTP sem er kerfi tengd gervigreind. Hægt er að mata þetta kerfi og önnur sambærileg af spurningum og biðja um að fá svör, ritgerðir, ræður, myndir, myndefni og margt fleira nánast samstundis og um hvaða málefni sem er. Þrátt fyrir að þetta sé að mörgu leiti gríðarlega hjálplegt og flýtir fyrir öllum verkferlum er önnur hlið á þessum tening sem þróunaraðilar gervigreindar hafa áhyggjur af.

Afleiðingar sem við erum þegar farin að sjá eru stórar uppsagnir hjá tæknifyrirtækjum eins og Meta, Google, Dropbox og mörgum öðrum. Gervigreind getur nú leyst af hundruði þúsunda starfa sem áður kröfðust lifandi einstaklinga til að framkvæma. Það er því ekki að ástæðulausu að það eru vaxandi áhyggjur meðal fólks. Á þessum stutta tíma frá því að við fórum að heyra um Chat GTP, hefur þróunin vaxið hraðar en nokkur önnur tækni og hvert hún mun leiða okkur ef ekki verður brugðist við er erfitt að sjá fyrir. Eitt er víst að nú þegar eru milljónir starfa í hættu. Ef fyrirtæki geta skipt út launafólki fyrir gervigreind og sparað sér miljónir í launakostnað er ekki spurning hvað meirihlutinn mun gera. Ég er sjálfur með auglýsingastofu og nýti mér starfsfólk erlendis sem hefur unnið fyrir mig árum saman, ég sé að með þeirri tækni sem þegar er komin gæti ég þróað mína eigin gervigreind og sagt þessu fólki upp. Þannig að það eru mjög margar atvinnugreinar á þröskuldi mikilla breytinga og við erum í raun stiginn inn stærstu tæknibyltingu sem heimurinn hefur nokkurn tíma séð áður. Við gerum okkur enga grein fyrir því hvað þetta er að gerast hratt og hversu mikið heimurinn að breytast. Menn hafa sagt að internetið hreinlega fölnar við hliðina á því sem við erum að sjá gerast með gervigreindina og þær breytingar sem hún mun hafa á daglegt líf fólks í framtíðinni.

Með alla tækni þá er hægt að nota hana til góðs eða ills. Gervigreind og “Deep Fake” eða djúpgervi er nú þegar orðin að veruleika og við getum í raun varla greint muninn á því sem er rétt og því sem er falsað. Nú þegar er verið að nota andlit þekktra og óþekktra einstaklinga til að framleiða klámefni án þeirra samþykkis. Þessa tækni er hægt að nota til að líkja eftir þjóðarleiðtogum, kvikmyndaleikurum, stjórnmálafólki og áhrifavöldum til að setja fram skilaboð sem geta haft áhrif á stríð, kosningar og margt fleira. Við lifum á fordæmalausum tímum og margt af því sem ég er að fjalla um hefur komið upp á yfirborðið á mjög skömmum tíma.

Ég hvet ykkur til að skoða þessa síðu www.metaphysic.ai og horfa á þetta mynband til að sjá hversu raunveruleg þessi tækni er orðin.

Merki dýrsins

Það er miklu meira að gerast á bakvið tjöldin sem hægt væri að segja um Gervigreindina, Humanoids, CERN, CBDC, Amazon Go og margt fleira. Við erum mjög líklega að horfa á síðust ár hefðbundins fjármagns sem mun leiða til þess að engin mun geta keypt eða selt nema verða hluti af nýju kerfi sem gæti verið Central Bank Digital Currency eða eitthvað því um líkt, kerfi þar sem allt flæði fjármagns mun hugsanlega verða í gegnum bálkakeðjur eða nýja tækniþar sem yfirvöld geta séð allt sem allir gera. Við getum reyndar alveg sagt að við séum þegar hluti af kerfi og það er erfitt að stunda viðskipti nema hafa bankareikning, greiðslukort, greiða skatta af innkomu og þess háttar, en það er enn hægt að eiga viðskipti með peninga án aðkomu þriðja aðila en það er breytast.

Hvað segir Biblían um þessa hluti

Opinberunarbókin 13.kafli

Þá sá ég dýr stíga upp af hafinu. Það hafði tíu horn og sjö höfuð, og á hornum þess voru tíu ennisdjásn og á höfðum þess voru guðlöstunar nöfn. -2- Dýrið, sem ég sá, var líkt pardusdýri, fætur þess voru sem bjarnarfætur og munnur þess eins og ljónsmunnur. Drekinn gaf því mátt sinn og hásæti sitt og vald mikið. -3- Eitt af höfðum þess virtist sært til ólífis, en banasár þess varð heilt. Öll jörðin fylgdi dýrinu með undrun, -4- og þeir tilbáðu drekann, af því að hann hafði gefið dýrinu vald sitt. Og þeir tilbáðu dýrið og sögðu: Hver jafnast við dýrið og hver getur barist við það? -5- Og því var gefinn munnur, er talaði stóryrði og guðlastanir, og lofað að fara því fram í fjörutíu og tvo mánuði. -6- Og það lauk upp munni sínum til lastmæla gegn Guði, til að lastmæla nafni hans og tjaldbúð hans og þeim, sem á himni búa. -7- Og því var leyft að heyja stríð við hina heilögu og sigra þá, og því var gefið vald yfir sérhverri kynkvísl og lýð, tungu og þjóð. -8- Og allir þeir, sem á jörðunni búa, munu tilbiðja það, hver og einn sá er eigi á nafn sitt ritað frá grundvöllun veraldar í lífsins bók lambsins, sem slátrað var. -9- Sá sem hefur eyra, hann heyri. -10- Sá sem ætlaður er til herleiðingar verður herleiddur. Sá sem sverði er ætlaður verður deyddur með sverði. Hér reynir á þolgæði og trú hinna heilögu. -11- Og ég sá annað dýr stíga upp af jörðinni og það hafði tvö horn lík lambshornum, en það talaði eins og dreki. -12- Það fer með allt vald fyrra dýrsins fyrir augsýn þess og það lætur jörðina og þá, sem á henni búa, tilbiðja fyrra dýrið, sem varð heilt af banasári sínu. -13- Og það gjörir tákn mikil, svo að það lætur jafnvel eld falla af himni ofan á jörðina fyrir augum mannanna. -14- Og það leiðir afvega þá, sem á jörðunni búa, með táknunum, sem því er lofað að gjöra í augsýn dýrsins. Það segir þeim, sem á jörðunni búa, að þeir skuli gjöra líkneski af dýrinu, sem sárið fékk undan sverðinu, en lifnaði við. -15- Og því var leyft að gefa líkneski dýrsins anda, til þess að líkneski dýrsins gæti einnig talað og komið því til leiðar, að allir yrðu þeir deyddir, sem ekki vildu tilbiðja líkneski dýrsins. -16- Og það lætur alla, smáa og stóra, auðuga og fátæka og frjálsa og ófrjálsa, setja merki á hægri hönd sér eða á enni sín -17- og kemur því til leiðar, að enginn geti keypt eða selt, nema hann hafi merkið, nafn dýrsins, eða tölu nafns þess. -18- Hér reynir á speki. Sá sem skilning hefur reikni tölu dýrsins, því að tala manns er það, og tala hans er sex hundruð sextíu og sex.

Opinberunarbókin fjallar um þá hluti sem hafa verið og þá hluti sem enn eiga eftir að ganga í uppfyllingu áður en Jesús kemur aftur. Drekinn er djöfullinn og dýrin sem um ræðir í kaflanum að ofan eru að öllum líkindum stórveldi, sameinað vald þjóða eða einstaklinga sem leitt er af aðila eða aðilum sem er(u) undir valdi Satans. Vald sem mun leiða yfir heiminn slíkar breytingar sem mun hafa áhrif á alla byggjendur jarðarinnar.

Þetta líkneski var lengi til sýnis fyrir utan Sameinuðu þjóðirnar og verður að teljast líkt dýrinu sem lýst er í Opinberunarbókinni hér að ofan.

Það sem skiptir máli er að gera sér grein fyrir því að vald þessara dýra og drekans verður ógnvænlegt og öll heimsbyggðin mun fylgja þeim og tilbiðja.

Hvernig lítur þetta vald út

Nýverið sáum við sýnishorn af því hvernig hægt er að nánast þvinga okkur til að gangast undir ok sem nú er að koma í ljós að hafði alvarlegar afleiðingar. Við máttum ekki ferðast nema hafa vottorð, mörgum var hótað uppsögnum ef þeir fylgdu ekki fjöldanum, þú gast ekki verslað nema bera grímur og hópþrýstingurinn var gríðarlegur ef þú spilaðir ekki með. Ég er að tala um bólusetningarnar við Covid sem áttu að vera allra meina bót og fólk var skikkað í hverja sprautuna á fætur annarri og nú eru afleiðingarnar að koma í ljós og þær eru víðtækar.

Rannsóknir sýna mikla aukningu blóðsjúkdóma, ófrjósemi, fósturláta og fleiri kvilla fyrir og eftir Covid og frá og með apríl í fyrra hafa fleiri dáið úr hópi þeirra sem eru bólusettir.

Valdið sem er talað um í 13. kafla opinberunarbókarinnar mun ganga skrefinu lengra og miðað við að flestir voru tilbúnir að sprauta sig með nánast óreyndu bóluefni aftur og aftur af því að þeim var sagt að gera það af yfirvöldum, hversu margir munu þá taka merki dýrsins á enni sér eða hönd til að geta keypt og selt. Við erum að tala um ógnarvald sem mun breyta öllum heiminum og við erum að sjá það fæðast fyrir framan augun á okkur.

Matt 7:13

Gangið inn um þrönga hliðið. Því að vítt er hliðið og vegurinn breiður, sem liggur til glötunar, og margir þeir, sem þar fara inn.

Tæknin er slík að nú þegar eru komnar búðir án starfsfólks þar sem þú gengur inn og notast við símann þinn til að auðkenna þig og versla án þess að nokkur notist við peninga og ef þú ert ekki hluti af kerfi Amazon þá getur þú ekki verslað. Hversu langt er í að allar verslanir verði svona og hversu langt er í að tækni snjallsímans verði hreinlega orðinn föst við okkur með einhverjum hætti?  Sú þróun er komin lengra en við gerum okkur grein fyrir og nú þegar er hægt að lesa hugsanir okkar og tilfinningar í gegnum heilabylgjur ef við samþykkjum að bera slíka tækni.

Áhugaverð grein um þróun símans: Hvað kemur eftir snjallsímann?

Líkneski dýrsins

Opinberunarbókin 13:14-15

Og það leiðir afvega þá, sem á jörðunni búa, með táknunum, sem því er lofað að gjöra í augsýn dýrsins. Það segir þeim, sem á jörðunni búa, að þeir skuli gjöra líkneski af dýrinu, sem sárið fékk undan sverðinu, en lifnaði við. -15- Og því var leyft að gefa líkneski dýrsins anda, til þess að líkneski dýrsins gæti einnig talað og komið því til leiðar, að allir yrðu þeir deyddir, sem ekki vildu tilbiðja líkneski dýrsins.

Þegar við hugsum um líkneski þá sjáum við fyrir okkur mögulega gullkálfinn sem Ísraelsmenn tilbáðu, búddalíkneski eða styttur gerðar af mönnum, en líkneskið sem um ræðir í versunum hér að ofan er frábrugðið. Þetta líkneski er fenginn andi og því er gefið vald til að tala. Athyglisvert er að dýrið segir þeim sem á jörðunni búa að gera þetta líkneski. Mennirnir keppast nú við að þróa Ai eða gervigreind sem er orðinn svo öflug að hún getur ekki bara talað, hún getur breytt sér í hvaða form sem er og líkt eftir hverjum sem er og getur sagt hvað sem er. Ef þetta er í raun gervigreind sem verið er að tala um í opinberunarbókinni þá mun “Ai” fá slíkt vald að þeir sem gefa sig ekki undir þetta vald og tilbiðja það munu verða deyddir og þeir sem ekki taka merkið á enni sér og hönd munu ekki geta keypt eða selt.

Ég vona að ég hafi rangt fyrir mér og að þessi tækni verði til þess að breyta heiminum til góðs en ég skynja í andanum að við séum nær endurkomu Jesú Krists en okkur grunar og að við séum í raun á hraðri leið inn í þá tíma sem við lesum um í Opinberunarbókinni.

Þetta er það sem Guð segir okkur að gera þegar við sjáum þessa hluti koma fram.

Heb 10:25

Vanrækið ekki safnaðarsamkomur yðar eins og sumra er siður, heldur uppörvið hver annan, og það því fremur sem þér sjáið að dagurinn færist nær.

Lúk 21:36

Vakið því allar stundir og biðjið, svo að þér megið umflýja allt þetta, sem koma á, og standast frammi fyrir Mannssyninum.

Nútíma skurðgoðadýrkun

Það er saga í Biblíunni sem fjallar um hvernig Ísraelsmenn urðu vitni að þvílíkum kraftaverkum Guðs þegar hann leiddi þá út úr Egyptalandi og í gegnum Rauða hafið. Þeir fengu að sjá Guð á áþreifanlega hátt en það voru varla liðnir nokkrir dagar þegar þeir snéru sér að skurðgoðum og fóru að tilbiðja aðra Guði. Hvernig er það með okkur í dag, þú færð snertingu frá Guði, upplifir kraft heilags anda á samkomu en ert svo mögulega kominn í símann strax á eftir klukkutímunum saman eða eitthvað annað sem tekur hug þinn allann.

2. Mósebók 32.kafli

Er fólkið sá, að seinkaði komu Móse ofan af fjallinu, þyrptist fólkið í kringum Aron og sagði við hann: Kom og gjör oss guð, er fyrir oss fari, því að vér vitum ekki, hvað af þessum Móse er orðið, manninum, er leiddi oss burt af Egyptalandi. -2- Og Aron sagði við þá: Slítið eyrnagullin úr eyrum kvenna yðar, sona og dætra, og færið mér. -3- Þá sleit allt fólkið eyrnagullin úr eyrum sér og færði Aroni, -4- en hann tók við því af þeim, lagaði það með meitlinum og gjörði af því steyptan kálf. Þá sögðu þeir: Þetta er guð þinn, Ísrael, sem leiddi þig út af Egyptalandi. -5- Og er Aron sá það, reisti hann altari fyrir framan hann, og Aron lét kalla og segja: Á morgun skal vera hátíð Drottins. -6- Næsta morgun risu þeir árla, fórnuðu brennifórnum og færðu þakkarfórnir. Síðan settist fólkið niður til að eta og drekka, og því næst stóðu þeir upp til leika. -7- Þá sagði Drottinn við Móse: Far þú og stíg ofan, því að fólk þitt, sem þú leiddir út af Egyptalandi, hefir misgjört. -8- Skjótt hafa þeir vikið af þeim vegi, sem ég bauð þeim. Þeir hafa gjört sér steyptan kálf, og þeir hafa fallið fram fyrir honum, fært honum fórnir og sagt: Þetta er guð þinn, Ísrael, sem leiddi þig út af Egyptalandi.

Það sem þú fæðir það vex og dafnar. Ef þú ert ert duglegur í ræktinni þá styrkist þú, ef þú æfir á hljóðfæri á hverjum degi verður þú betri. Ef þú borðar hollt og hugsar vel um þig, þá líður þér betur. Ef þú sáir í holdið því sem holdlegt er, verður þú holdlegur sem er andstæðan við að vera andlegur.

Galatabréfið 6:7-8

Villist ekki! Guð lætur ekki að sér hæða. Það sem maður sáir, það mun hann og uppskera. -8- Sá sem sáir í hold sjálfs sín, mun af holdinu uppskera glötun, en sá sem sáir í andann, mun af andanum uppskera eilíft líf.

Jak 4:8

Nálægið yður Guði, og þá mun hann nálgast yður. Hreinsið hendur yðar, þér syndarar, og gjörið hjörtun flekklaus, þér tvílyndu.

Erum við í nútímasamfélagi betri en Ísraelsmenn ?

Biblían talar um að við eigum að elska Drottinn Guð af öllu hjarta, öllum mætti og allri sálu okkar og hafa ekki aðra guði, ekki tilbiðja þá eða dýrka. Annað vers segir að við eigum ekki að láta neitt hafa vald yfir okkur.

Hversu langt er síðan að þú tókst þér hlé frá símanum, samfélagsmiðlum ? Hvað er í fyrsta sæti í þínu lífi? Það sem þú eyðir mestum tíma í verður þitt skurðgoð, við vitum flest að allur heimurinn er sokkinn ofan í símana sína. Margt annað sem getur talist sem skurðgoð á sér stað í gegnum símana, hvort sem það fíkn í fjármuni, fjárhættuspil, klám, samfélgasmiðlar, tölvuleikir, Netflix eða annað þessu líkt. Internetið hefur mikil áhrif á mótun barna á uppeldisárunum, áhrifavaldar, Youtube og fleiri miðlar mata heimsbyggðina á upplýsingum sem aldrei fyrr og mikið af því er óguðlegt efni.

Þetta minnir mann á aldingarðinn Eden, það voru tvö tré í garðinum, lífsins tré og skilningstré góðs og ills. Það var í raun þorsti eftir þekkingu sem varð Evu að falli. Í dag fyllum við huga okkar að þekkingu og upplýsingum í stað þess að verja tíma okkar við lífsins tré, í andlegu samfélagi við lifandi Guð og ávextirnir af þessu vali eru augljósir í heiminum. Það þarf ekki að fara nema 20 ár aftur í tímann og bera saman við daginn í dag, skotárásir þar sem fólk reynir að drepa sem flesta, dauðsföll vegna eiturlyfja og áfengis, sjálfsmorðum vegna óhamingju og tilgangsleysis og margt fleira. Það er gríðarleg aukning á öllum þessum sviðum.

Við stöndum frammi fyrir mestu ógn allra tíma og við eigum ekki möguleika nema nálægja okkur Guði. Lestu Biblíuna þína daglega, verðu tíma með Guði í bæn og vertu viss um að þú eigir persónulegt samband við hann og að þú heyrir þegar hann talar við þig, aðeins hann getur varðveitt okkur í gegnum það tímabil sem er fram undan og er þegar hafið.

Guð blessi þig og varðveiti.

Við áramót eru margir sem setja sér markmið. Margir gefast fljótt upp og falla til baka í sama gamla farið á meðan aðrir ná markmiðum síðum. Sum markmið eru óraunhæf en önnur gerleg.

Hvað skilur í sundur þá sem ná sínum markmiðum og þeim sem ná þeim ekki og hvernig getur þú sett markmið sem þú nærð að standast?

Eins og með allt í þessu lífi þá höfum við einn raunverulegan leiðarvísir þar sem allur sannleikur býr og ef við byggjum ekki líf okkar á honum þá munum við bregðast að lokum. Því án Guðs er engin leið að frelsast frá dauðanum sem ætti að vera okkar æðsta markmið, þ.e að öðlast eilíft líf. Við höfum mörg vers í Biblíunni sem kenna okkur um markmið og hvernig við náum raunverulegum árangri.

Hvað eru göfug markmið?

Markmiðin eru misjöfn eins og þau eru mörg. Geta verið betri heilsa, hollara mataræði, fara í ræktina, verða betri manneskja, eignast meiri fjármuni, fá betri vinnu, verða betri foreldri, læra á hljóðfæri svo eitthvað sé nefnt. Það eru mörg göfug markmið sem geta gert líf okkar betra á þessari jörð. Þessi markmið krefjast öll fórna, metnaðar, sjálfaga og fl. Til að fá betri vinnu og hærri laun, þá þarf þú að verða betri, þú þarft mögulega að auka þekkingu þína, auka afköst þín, standa þig betur en þú hefur gert.

“Life and business is like the changing seasons. You cannot change the seasons, but you can change yourself. Therein lies the opportunity to live an extraordinary life–the opportunity to change yourself.” – Jim Rohn

Ég hef lesið margar af þekktustu sjálfshjálparbókum þessa heims eins og “Think and Grow Rich”, “7 Strategies for Wealth and Happiness”, “How to Win Friends & Influence People”, Eat That Frog”, “The 7 Habits of Highly Effective People”, Rich Dad, Poor Dad” og fleiri. Þrátt fyrir að ég sé ekki sammála öllu í þessum bókum þegar ég ber þær saman við bók bókanna “Biblíuna”. Þá eiga þessar bækur það allar sameiginlegt að byggja boðskap sinn á lögmálum Guðs, því jú það eru engin önnur lögmál. Við getum svo sannarlega haft önnur markmið en að verða bara rík á fjármuni. Það sem þessir aðilar eiga sameiginlegt er að þeir náðu undraverðum árangri í því sem þeir tóku sér fyrir hendur og því er hægt að nota sömu aðferðir til þess að ná andlegum og göfugum markmiðum.

Andlegar rætur orsökin af öllum okkar brestum

Hér liggur leyndardómur sem fæstir hafa í huga þegar þeir setja sér markmið. Markmið eru skrifuð niður og svo hefst baráttan, einn dag í einu, borða hollt, fara í ræktina, svo líða dagarnir og áður en þú veist af eru markmiðin brostin og allt komið í sömu venjur og áður. Það þarf að skoða rótina, hvers vegna er ég í yfirþyngd, hvers vegna borða ég allt of mikið af sætindum, hvers vegna drekk ég of mikið áfengi, hvers vegna leita ég í þetta eða hitt sem er ekki gott fyrir mig? Yfirleitt er það vegna þess að það er verið að deyfa andlegan sársauka tímabundið með holdlegum nautnum. Ef það er ekki tekist á við rótina, andlegu meinin og sársaukann, eru yfirgnæfandi líkur á að markmiðin verði að engu og sömu gömlu leiðirnar farnar til að deyfa. Við þurfum að biðja Guð um að rannsaka hjörtun okkar og sýna okkur hvar rótin liggur og biðja Hann um að hjálpa okkur að græða sárin.

Þrjú skref grundvöllurinn að því að ná markmiðum

Fyrsta skrefið: Matt 6:33

“…leitið fyrst ríkis hans og réttlætis, þá mun allt þetta veitast yður að auki.”

Hér liggur lykillinn að allri velgengni. Þetta er langt frá því að vera eina versið í Biblíunni sem kennir, að ef við leitum vilja Guðs, fylgjum Hans Orði og lögmálum þá mun okkur vegna vel. Drottinn er með okkur, ekki á móti, og Hann vill að okkur vegni vel. Hann hefur gefið okkur lögmálin til þess að skilja þau og breyta eftir þeim og þau hafa ekki breyst. Þau hafa verið eins frá grundvöllun veraldar og ef að höfundar bókanna sem ég nefndi fyrir ofan náðu árangri með því að fylgja lögmálum Guðs, getur þú það.

“Success is nothing more than a few simple disciplines, practiced every day.” – Jim Rohn

Annað skrefið: Orðskv. 16:1-3

Fyrirætlanir hjartans eru á mannsins valdi, en svar tungunnar kemur frá Drottni. -2- Manninum þykja allir sínir vegir hreinir, en Drottinn prófar hugarþelið. -3- Fel þú Drottni verk þín, þá mun áformum þínum framgengt verða.

Það eru mörg vers sem sýna okkur að það er gott að setja sér markmið og fyrirætlanir. Þau þurfa samt að vera samkvæmt vilja Guðs og því sem er gott fyrir líf okkar. Markmið þessa lífs er ekki eitthvað sem við náum og er svo bara komið. Markmiðin þurfa að verða lífsstefna og raunveruleg rútína alla daga. Þú borðar ekki hollt í þrjár vikur og þá er þetta bara komið. Við erum í raunverulegri baráttu við holdið og djöfulinn sem stöðuglega reynir að ánetja okkur óhollum lífsskaðandi venjum sem að lokum leiða til dauða. Við verðum að hafa mun háleitari markmið en svo að við ætlum að taka einhvern kúr eða hætta einhverju um stund, hvíla okkur aðeins á einhverju. Við þurfum að útrýma hinu illa úr lífi okkar í eitt skipti fyrir öll og keppast að markinu sem er vaxtartakmark Krist fyllingar. Aðalmarkmiðið er svo hægt að brjóta niður í mörg undirmarkmið sem auðvelda sigur. Hér fyrir neðan ætla ég að útlista mín markmið og ávinninginn.

Ég setti mér markmið árið 2023 sem hljómaði svona:

Halda áfram að stíga inn í köllun mína og þjónustu og byrja á litlum skrefum eins og að skrifa greinar. Síðar taka upp myndskeið. Tilgangurinn er að gera köllun mína og útvalningu vissa.

Síðan þá hef ég skrifað nokkrar greinar, þjónað í United RVK þar sem ég bæði er í fyrirbænaþjónustu og hef verið að kenna. Búin að taka upp fyrsta myndskeiðið, þýtt margar greinar fyrir Secrets of the Kingdom, og þjónað og kennt staðfastlega í heimahópnum. Þetta er ekki í fyrsta skipti sem ég hef skrifað niður markmið mín og séð þau ganga í uppfyllingu. Ég get listað upp fullt af markmiðum undanfarin ár sem hafa gengið í uppfyllingu með því að skrifa þau niður og brjóta þau upp í undirmarkmið. Þannig að ég veit að þetta virkar og virkar vel sé rétt af því staðið.

Nú hef ég uppfært markmið mín sem er gott að gera reglulega, það verða stundir þar sem við bregðumst og föllum í gamla farið, en ekki gefast upp. Alltaf að rísa upp aftur og halda áfram!

Orðskv. 16:26-27

Gjör braut fóta þinna slétta, og allir vegir þínir séu staðfastir. -27- Vík hvorki til hægri né vinstri, haltu fæti þínum burt frá illu.

Mín markmið fyrir 2025

Aðalmarkmið

Verða eitt með Guði og ná vaxtartakmarki Krists fyllingar svo Guð geti notað mig ásamt öðrum á undursamlegan hátt til að leiða fjölda til trúar og lækninga, með kraftaverkum, táknum og undrum.

Undirmarkmið 1 – Heilsa, mataræði og aukin hamingja:

1. Vakna 05:30
2. Biðja og lesa í Orðinu
3. Borða hollan mat og ekkert eftir 20:00 á kvöldin.
4. Æfa reglulega og teygja.
5. Kvöldbæn og lestur frá 21:00.
6. Fara að sofa klukkan 22:00.

Ávinningur: Þetta undirmarkmið mun gera mér betur kleift að höndla áskoranir lífsins, hafa aukið úthald, betri heilsu, andlegt jafnvægi, aukna gleði og hamingju til að leita og þjóna Drottni af öllu hjarta, verða betri faðir og manneskja í öllum samskiptum og kærleika.

Undirmarkmið 2 – Betri faðir:

Byggja upp börnin mín upp í trú á Jesú Krist, þjálfa þau í samskiptum, fjármálum, markmiðum, kærleika, hlýðni, umgengni, og öðrum góðum kostum.

Ávinningur: Lykilskylda mín sem faðir er að undirbúa börnin mín fyrir lífið og framtíðina. Ávinningurinn er mikill í formi samskipta, umgengni, hjálpsemi og gæðastunda með fjölskyldunni. Einnig er mikill ávinningur fyrir þau að vera vel undirbúin fyrir lífið og þær áskoranir sem bíða þeirra.

Undirmarkmið 3 – Verða skuldlaus:

Þetta markmið þarf að vinna markvisst og skera niður útgjöld þar sem hægt er. Byrja á því að gera áætlun, borga niður fyrst lánin með hæstu vextina og leita leiða til að hagræða í rekstri og tekjum.

Ávinningur: Að skulda engum neitt er það sem við eigum að sækjast eftir og hefur gríðarlegan ávinning í för með sér. Minna stress, færri áhyggjur, meiri tími til að einbeita sér að aðal- og undirmarkmiðum. Auknar gæðastundir með fjölskyldunni og sjálfum sér.

Undirmarkmið 4 – Fasta reglulega

Í desember lagði Guð sterkt á hjarta mitt að fara inn í langa föstu. Þetta breytti lífi mínu og styrkti samband mitt við Jesú gríðarlega. Þetta var svo öflugt að ég get ekki hugsað mér að fasta ekki reglulega héðan í frá því ég vil aldrei fara til baka í að vera ekki brennandi fyrir Drottinn.

Ávinningur: Gríðalegur ávinningur er í að fasta og biðja og má helst nefna að næmni í andanum eykst til muna og persónulega sambandið við Drottinn verður svo miklu nánara. Sjálfstjórn og agi vex til muna í öllu og öll barátta verður auðveldari. Yfirnáttúrulegur friður vex til muna og þegar við lendum í mótlæti erum við mun betur í stakk búin til að svara því með rósemi og kærleika. Ávöxturinn sem kemur fram í lífi okkar er því einstakur vitnisburður um Jesú Krist og yfirnáttúrlega breytingu sem fólk tekur eftir.

Undirmarkmið 5 – Slá HSK met í hlaupum árið 2025 í mínum flokk 40-44 ára.

Það er góð tilfinning að leggja eitthvað á sig og uppskera. Ég elska að hlaupa og mér gengur vel í því sem ég hef tekið eftir að gefur fólki í kringum mig innblástur að leggja sig betur fram með sín markmið.

Ávinningur: Góð heisla og ögun í þjálfun og lífinu. Einnig gefur það mér mikið þegar ég heyri fólk segja að það hafi byrjað að hlaupa af því að ég gaf því innblástur. Þannig að leggja sig fram í einhverju og ganga vel í því hefur góð áhrif á fólk sem fylgist með okkur og þannig getum við líka laðað fólk að Kristi.

Vel útfærð markmið eru mun líklegri til að verða að veruleika og geta hjálpað þér að verða besta útgáfan af sjálfum þér. Hér er tengill á skjal sem ég hef útbúið fyrir ykkur ef þið viljið setja ykkur markmið á nýju ári.

Hlekkur á skjal: Markmið 2025

Þessi aðferð hentar ekki endilega öllum en hún hefur reynst mér gríðarlega vel. Ég hef því gefið mér tíma til þess að setja þetta niður á persónulegan hátt svo það geti orðið ykkur til innblásturs og blessunar.

Hér eru nokkur öflug vers sem gott er að hafa í huga varðandi markmið, en allt sé gert í samræmi við vilja Guðs fyrir líf eins og hvers.

—

Fil 3:13-14

Bræður, ekki tel ég sjálfan mig enn hafa höndlað það. -14- En eitt gjöri ég. Ég gleymi því, sem að baki er, en seilist eftir því, sem fram undan er, og keppi þannig að markinu, til verðlaunanna á himnum, sem Guð hefur kallað oss til fyrir Krist Jesú.

Jak 4:13-14

Heyrið, þér sem segið: Í dag eða á morgun skulum vér fara til þeirrar eða þeirrar borgar, dveljast þar eitt ár og versla þar og græða. -14- Þér vitið ekki hvernig líf yðar mun verða á morgun. Því að þér eruð gufa, sem sést um stutta stund en hverfur síðan. -15- Í stað þess ættuð þér að segja: Ef Drottinn vill, þá bæði lifum vér og þá munum vér gjöra þetta eða annað.

Fil 4:8 og 13

-8- Að endingu, bræður, allt sem er satt, allt sem er göfugt, rétt og hreint, allt sem er elskuvert og gott afspurnar, hvað sem er dyggð og hvað sem er lofsvert, hugfestið það.

-13- Allt megna ég fyrir hjálp hans, sem mig styrkan gjörir.

Orðskv. 16:3

Fel þú Drottni verk þín, þá mun áformum þínum framgengt verða.

—

Megi Guð gefa þér blessað og farsælt ár 2025.

Sigurður Júlíusson

Fyrir grundvöllun veraldar

Þessi grein verður með  öðruvísi sniði en venjulega þar sem þetta er meira “self-study” eða samansafn af versum og hugleiðingum fyrir þig til að rannsaka. Ég fór ítarlega í þetta efni í síðasta heimahóp þar sem ég kenni vikulega það sem Drottinn leggur mér á hjarta.

Ef þú hefur áhuga á að vera hluti af okkar heimahóp hafðu þá samband við mig í gegnum síðuna eða tölvupóst.

Ég ráðlegg þér að gefa þér tíma í að rannsaka og hugleiða vel þessa kennslu því hún er merkileg og beint úr Orðinu. Orðið er það eina sem við getum 100% treyst í þessum heimi. Himinn og jörð munu líða undir lok en mín Orð mín munu aldrei undir lok líða sagði Drottinn.

Efe 1:4

Áður en heimurinn var grundvallaður hefur hann útvalið oss í Kristi, til þess að vér værum heilagir og lýtalausir fyrir honum. Í kærleika sínum -5- ákvað hann fyrirfram að veita oss sonarrétt í Jesú Kristi. Sá var vilji hans og velþóknun -6- til vegsemdar dýrð hans og náð, sem hann lét oss í té í sínum elskaða syni. -7- Í honum, fyrir hans blóð eigum vér endurlausnina og fyrirgefningu afbrota vorra. -8- Svo auðug er náð hans, sem hann gaf oss ríkulega með hvers konar vísdómi og skilningi.

-9- Og hann kunngjörði oss leyndardóm vilja síns, þá ákvörðun, -10- sem hann hafði með sjálfum sér ákveðið að framkvæma, er fylling tímans kæmi: Hann ætlaði að safna öllu því, sem er á himnum, og því, sem er á jörðu, undir eitt höfuð í Kristi. -11- Í honum höfum vér þá líka öðlast arfleifðina, eins og oss var fyrirhugað samkvæmt fyrirætlun hans, er framkvæmir allt eftir ályktun vilja síns, -12- til þess að vér, sem áður höfum sett von vora til Krists, skyldum vera dýrð hans til vegsemdar. -13- Í honum eruð og þér, eftir að hafa heyrt orð sannleikans, fagnaðarerindið um sáluhjálp yðar og tekið trú á hann og verið merktir innsigli heilags anda, sem yður var fyrirheitið. -14- Hann er pantur arfleifðar vorrar, að vér verðum endurleystir Guði til eignar, dýrð hans til vegsemdar.

-17- Ég bið Guð Drottins vors Jesú Krists, föður dýrðarinnar, að gefa yður anda speki og opinberunar, svo að þér fáið þekkt hann. -18- Ég bið hann að upplýsa sálarsjón yðar, svo að þér skiljið, hver sú von er, sem hann hefur kallað oss til, hver ríkdómur hans dýrlegu arfleifðar er, sem hann ætlar oss meðal hinna heilögu, -19- og hver hinn yfirgnæfandi máttur hans við oss, sem trúum. En þetta er sami áhrifamikli, kröftugi mátturinn, -20- sem hann lét koma fram í Kristi, er hann vakti hann frá dauðum og lét hann setjast sér til hægri handar í himinhæðum, -21- ofar hverri tign og valdi og mætti, ofar öllum herradómi og sérhverju nafni, sem nefnt er, ekki aðeins í þessari veröld, heldur og í hinni komandi.

Ef þú ert útvalinn í Guði, þá varst þú ekki útvalinn hér, þú varst útvalinn áður en heimurinn hófst. Það er ekki fyrir áreynslu, verk, föstu eða neitt sem þú getur gert í eigin mætti. Þetta er aðeins fyrir trú og opinberun. Ef þú ert útvalinn ertu hluti af Honum og hefur alltaf verða hluti af Honum því Hann er „I AM“ eilífur. Við skulum samt athuga að það er ekki allir útvaldir og margir aðrir sem munu frelsast og verða hólpnir fyrir náð.

Matt 22:14

Því að margir eru kallaðir, en fáir útvaldir.

Hver er tilgangur hinna útvöldu?

Róm 8:19

Því að sköpunin þráir, að Guðs börn verði opinber.

Róm 11:2-6

Eða vitið þér ekki, hvað Ritningin segir í kaflanum um Elía, hvernig hann kemur fram fyrir Guð með kæru á hendur Ísrael:-3- Drottinn, spámenn þína hafa þeir drepið og rifið niður ölturu þín og ég er einn skilinn eftir, og þeir sitja um líf mitt.-4- En hvaða svar fær hann hjá Guði? Sjálfum mér hef ég eftir skilið sjö þúsundir manna, sem hafa ekki beygt kné fyrir Baal.-5- Svo eru þá líka á vorum tíma leifar orðnar eftir, sem Guð hefur útvalið af náð. 6- En ef það er af náð, þá er það ekki framar af verkum, annars væri náðin ekki framar náð.

Margir eru kallaðir og munu frelsast en ég trúi að það sé annar hópur sem er útvalinn fyrir grundvöllun veraldar, hópur sem fyrirfram var ákveðinn til að koma á jörðina og þjóna, brúður Jesús Krist sem var alltaf hluti af Honum. Ég trúi því að á öllum öldum hafi Guð átt brúði “útvalda” og að t.d. lærisveinarnir hafi verið hluti af þeim hóp. Ég trúi að núna á síðustu tímum muni stærsti hópurinn „Brúðurinn“ koma fram í loka vakningu sem kölluð verður „Vakning brúðarinnar“ Orðið mun koma enn á ný til jarðar eins og það gerði í Jesú en núna í brúðinni.

Róm 8:29

Vér vitum, að þeim, sem Guð elska, samverkar allt til góðs, þeim sem kallaðir eru samkvæmt ákvörðun Guðs. -29- Því að þá, sem hann þekkti fyrirfram, hefur hann og fyrirhugað til þess að líkjast mynd sonar síns, svo að hann sé frumburður meðal margra bræðra. -30- Þá sem hann fyrirhugaði, þá hefur hann og kallað, og þá sem hann kallaði, hefur hann og réttlætt, en þá sem hann réttlætti, hefur hann einnig vegsamlega gjört. (Þátíð)

Eitt af mínum uppháhaldversum sem sýnir glöggt að Jesús hafi verið frumburður margra bræðra sem myndu koma eftir Hann. Guð sýndi okkur í Kristi hvernig fullþroska sonur Guðs lítur út. Hann segir að þeir sem trúa og greiða gjaldið munu gera sömu verk og meiri, því Jesús fór aftur til Föðurins þaðan sem Hann kom og brúður endatímanna mun vinna sitt verk og fara svo aftur til Föðurins þaðan sem hún einnig kom. Því hinir útvöldu eru ekki af þessum heimi eins og Jesús var ekki af þessum heimi. Jesús sagði ég geri ekkert nema það sem ég heyri eða sé Faðir minn gjöra, eins mun brúðurinn leggja niður sitt líf og gera ekkert nema það sem hún heyrir eða sér Föðurinn gera.

Opb 19:6-9

Þá heyrði ég raddir sem frá miklum mannfjölda og sem nið margra vatna og sem gný frá sterkum þrumum. Þær sögðu: Hallelúja, Drottinn Guð vor, hinn alvaldi, er konungur orðinn. -7- Gleðjumst og fögnum og gefum honum dýrðina, því að komið er að brúðkaupi lambsins og brúður hans hefur búið sig. -8- Henni var fengið skínandi og hreint lín til að skrýðast í. Línið er réttlætisverk heilagra. -9- Og hann segir við mig: Rita þú: Sælir eru þeir, sem boðnir eru í brúðkaupsveislu lambsins. Og hann segir við mig: Þetta eru hin sönnu orð Guðs.

Það er eitt að vera brúður það er annað að vera brúðkaupsgestur.

Opb 22:17

Og andinn og brúðurin segja: Kom þú! Og sá sem heyrir segi: Kom þú! Og sá sem þyrstur er, hann komi. Hver sem vill, hann fær ókeypis lífsins vatn.

Jóel 2

-1- Þeytið lúðurinn í Síon og æpið óp á mínu heilaga fjalli, svo að allir íbúar landsins nötri. Því að dagur Drottins kemur, já, hann er í nánd, -2- dagur myrkurs og dimmu, dagur skýþykknis og skýsorta. Eins og sorti breiðist yfir fjallahnjúkana mikil og voldug þjóð. Hennar líki hefir ekki verið frá eilífð, og hennar líki mun ekki koma eftir hana allt fram á ár ókominna alda. -3- Fyrir henni fer eyðandi eldur og eftir henni logi brennandi. Þótt landið fram undan henni hafi verið eins og Edensgarður, er það á bak henni sem eyðiöræfi. Enginn hlutur komst undan henni. -4- Ásýndum eru þeir sem hestar að sjá, og þeir eru fráir sem riddarar. -5- Eins og glamrandi vagnar stökkva þeir yfir fjallahnjúkana, eins og eldslogi, sem snarkar í hálmleggjum, eins og voldug þjóð, sem búin er til bardaga. -6- Fyrir henni skjálfa þjóðirnar, öll andlit blikna.
-11- Og Drottinn lætur raust sína þruma fyrir öndverðu liði sínu. Því að herlið hans er afar mikið, því að voldugur er sá, sem framkvæmir hans boð. Já, mikill er dagur Drottins og mjög ógurlegur, hver getur afborið hann?
-15- Þeytið lúðurinn í Síon, stofnið til helgrar föstu, boðið hátíðarstefnu. -16- Kveðjið saman lýðinn, helgið söfnuðinn, stefnið saman gamalmennum, safnið saman börnum og brjóstmylkingum. Brúðguminn gangi út úr herbergi sínu og brúðurin út úr brúðarsal sínum.
-27- Og þér skuluð viðurkenna, að ég er meðal Ísraels og að ég er Drottinn, yðar Guð, og enginn annar. Og þjóð mín skal aldrei að eilífu til skammar verða. -28- En síðar meir mun ég úthella anda mínum yfir allt hold. Synir yðar og dætur yðar munu spá, gamalmenni yðar mun drauma dreyma, ungmenni yðar munu sjá sjónir. -29- Já, einnig yfir þræla og ambáttir mun ég á þeim dögum úthella anda mínum. -30- Og ég mun láta tákn verða á himni og á jörðu: blóð, eld og reykjarstróka. -31- Sólin mun snúast í myrkur og tunglið í blóð, áður en hinn mikli og ógurlegi dagur Drottins kemur. -32- Og hver sem ákallar nafn Drottins, mun frelsast. Því að á Síonfjalli og í Jerúsalem mun frelsun verða, eins og Drottinn hefir sagt, meðal flóttamannanna, sem Drottinn kallar.

Opb 13:8-10

Og allir þeir, sem á jörðunni búa, munu tilbiðja það, hver og einn sá er eigi á nafn sitt ritað frá grundvöllun veraldar í lífsins bók lambsins, sem slátrað var.-9- Sá sem hefur eyra, hann heyri. -10- Sá sem ætlaður er til herleiðingar verður herleiddur. Sá sem sverði er ætlaður verður deyddur með sverði. Hér reynir á þolgæði og trú hinna heilögu.

Opb 20:6

Sæll og heilagur er sá, sem á hlut í fyrri upprisunni. Yfir þeim hefur hinn annar dauði ekki vald, heldur munu þeir vera prestar Guðs og Krists og þeir munu ríkja með honum um þúsund ár.

Aðeins fyrir opinberun

Matt 11:25-27

Á þeim tíma tók Jesús svo til orða: Ég vegsama þig, faðir, herra himins og jarðar, að þú hefur hulið þetta spekingum og hyggindamönnum, en opinberað það smælingjum. -26- Já, faðir, svo var þér þóknanlegt. -27- Allt er mér falið af föður mínum, og enginn þekkir soninn nema faðirinn, né þekkir nokkur föðurinn nema sonurinn og sá er sonurinn vill opinbera hann.

Guð hefur falið þessa opinberun fyrir augum heimsins en opinberað hana sonum Guðs á okkar dögum. Það er hula yfir augum manna, svo að þeir geta ekki tekið á móti.

Listi yfir 6 hulur úr Biblíunni:

• Fortjald musterisins (Matt 27:51)
• Fortjald tjaldbúðarinnar (Heb 9:3)
• Skýla Móse (2. Kor 3:13-14)
• Skýla líkama Jesú ( Heb 10:30(
• Hula hins vantrúaða (2. Kor 4:4)
• Hula yfir þjóðinni Ísrael (Róm 11:25)

Róm 11:7

Hvað þá? Það sem Ísrael sækist eftir, það hlotnaðist honum ekki, en hinum útvöldu hlotnaðist það. Hinir urðu forhertir, -8- eins og ritað er: Guð gaf þeim sljóan anda, augu sem sjá ekki, eyru sem heyra ekki, allt fram á þennan dag.

Róm 9:11-18

Nú, til þess að það stæði stöðugt, að ákvörðun Guðs um útvalningu væri óháð verkunum og öll komin undir vilja þess, er kallar,-12- þá var henni sagt, áður en sveinarnir voru fæddir og áður en þeir höfðu aðhafst gott eða illt: Hinn eldri skal þjóna hinum yngri.-13- Eins og ritað er: Jakob elskaði ég, en Esaú hataði ég.-14- Hvað eigum vér þá að segja? Er Guð óréttvís? Fjarri fer því.-15- Því hann segir við Móse: Ég mun miskunna þeim, sem ég vil miskunna, og líkna þeim, sem ég vil líkna.-16- Það er því ekki komið undir vilja mannsins né áreynslu, heldur Guði, sem miskunnar.-17- Því er í Ritningunni sagt við Faraó: Einmitt til þess hóf ég þig, að ég fengi sýnt mátt minn á þér og nafn mitt yrði boðað um alla jörðina.-18- Svo miskunnar hann þá þeim, sem hann vill, en forherðir þann, sem hann vill.

Orðsk 16:4

Allt hefir Drottinn skapað til síns ákveðna marks, svo og guðleysingjann til óheilladagsins.

Lúk 8:4

Nú var mikill fjöldi saman kominn, og menn komu til hans úr hverri borg af annarri. Þá sagði hann þessa dæmisögu: -5- Sáðmaður gekk út að sá sæði sínu. Og þá er hann sáði, féll sumt hjá götunni og varð fótum troðið, og fuglar himins átu það upp. -6- Sumt féll á klöpp. Það spratt, en skrælnaði, af því að það hafði ekki raka. -7- Og sumt féll meðal þyrna, og þyrnarnir spruttu einnig og kæfðu það. -8- En sumt féll í góða jörð, óx upp og bar hundraðfaldan ávöxt. Að svo mæltu hrópaði hann: Hver sem eyru hefur að heyra, hann heyri. -9- En lærisveinar hans spurðu hann, hvað þessi dæmisaga þýddi. -10- Hann sagði: Yður er gefið að þekkja leynda dóma Guðs ríkis, hinir fá þá í dæmisögum, að sjáandi sjái þeir ekki og heyrandi skilji þeir ekki. -11- En dæmisagan þýðir þetta: Sæðið er Guðs orð. -12- Það er féll hjá götunni, merkir þá, sem heyra orðið, en síðan kemur djöfullinn og tekur það burt úr hjarta þeirra, til þess að þeir trúi ekki og verði hólpnir. -13- Það er féll á klöppina, merkir þá, sem taka orðinu með fögnuði, er þeir heyra það, en hafa enga rótfestu. Þeir trúa um stund, en falla frá á reynslutíma. -14- Það er féll meðal þyrna, merkir þá er heyra, en kafna síðan undir áhyggjum, auðæfum og nautnum lífsins og bera ekki þroskaðan ávöxt. -15- En það er féll í góða jörð, merkir þá sem heyra orðið og geyma það í göfugu, góðu hjarta og bera ávöxt með stöðuglyndi.

Jóh 6:44

Enginn getur komið til mín, nema faðirinn, sem sendi mig, dragi hann, og ég mun reisa hann upp á efsta degi.

Róm 9:21-24

Eða hefur ekki leirkerasmiðurinn leirinn á valdi sínu, svo að hann megi gjöra úr sama deiginu ker til sæmdar og annað til vansæmdar?-22- En ef nú Guð, sem vildi sýna reiði sína og auglýsa mátt sinn, hefur með miklu langlyndi umborið ker reiðinnar, sem búin eru til glötunar,-23- og ef hann hefur gjört það til þess að auglýsa ríkdóm dýrðar sinnar á kerum miskunnarinnar, sem hann hafði fyrirfram búið til dýrðar?-24- Slík ker erum vér, sem hann hefur kallað, ekki aðeins úr flokki Gyðinga, heldur og úr flokki heiðingja

Guð er eilífur og því ekki háður tíma, hann er Alfa og Omega, upphafið og endirinn. Hann vissi fyrirfram hverjir myndu fylgja honum og þá kallaði Hann. Guð er því ekki óréttlátur, því hann forherðir og hylur fagnaðarerindið þeim sem glatast, því hann vissi að þessir myndu aldrei taka við Honum og við sjáum í Opinberunarbókinni að fólk mun vita að það er Guð sem er að dæma heiminn þegar loka dómurinn hefst og það mun formæla Honum, en samt ekkert vilja með Hann hafa.

2. Kor 4:3-4

En ef fagnaðarerindi vort er hulið, þá er það hulið þeim, sem glatast. -4- Því guð þessarar aldar? hefur blindað huga hinna vantrúuðu, til þess að þeir sjái ekki ljósið frá fagnaðarerindinu um dýrð Krists, hans, sem er ímynd Guðs.

Versið hér fyrir ofan virðist ekki vera í samræmi og hreinlega í þversögn við önnur vers. Því Orðið er skýrt að það er hinn eini sanni Guð, skapari himins og jarðar sem forherðir og setur hulu og blindu yfir þá sem glatast.

Smelltu á hnappinn til að lesa áhugaverða kennslu sem bendir á möguleikann á að þetta vers sé ekki rétt þýtt.

Eftir að hafa farið í gegnum þessa kennslu vandlega og séð hvað Orðið segir varðandi þessa hluti. Lestu þá vel í gegnum bæn Jesú og berðu saman hvað Hann er að hugsa þegar hann er að biðja fyrir hinum útvöldu.

Jóh 17

Þetta talaði Jesús, hóf augu sín til himins og sagði: Faðir, stundin er komin. Gjör son þinn dýrlegan, til þess að sonurinn gjöri þig dýrlegan. -2- Þú gafst honum vald yfir öllum mönnum, að hann gefi eilíft líf öllum þeim, sem þú hefur gefið honum. -3- En það er hið eilífa líf að þekkja þig, hinn eina sanna Guð, og þann sem þú sendir, Jesú Krist. -4- Ég hef gjört þig dýrlegan á jörðu með því að fullkomna það verk, sem þú fékkst mér að vinna.-5- Faðir, gjör mig nú dýrlegan hjá þér með þeirri dýrð, sem ég hafði hjá þér, áður en heimur var til. -6- Ég hef opinberað nafn þitt þeim mönnum, sem þú gafst mér úr heiminum. Þeir voru þínir, og þú gafst mér þá, og þeir hafa varðveitt þitt orð. -7- Þeir vita nú, að allt, sem þú hefur gefið mér, er frá þér, -8- því ég hef flutt þeim þau orð, sem þú gafst mér. Þeir tóku við þeim og vita með sanni, að ég er frá þér út genginn, og trúa því, að þú hafir sent mig. -9- Ég bið fyrir þeim. Ég bið ekki fyrir heiminum, heldur fyrir þeim sem þú hefur gefið mér, því að þeir eru þínir, -10- og allt mitt er þitt og þitt er mitt. Í þeim er ég dýrlegur orðinn. -11- Ég er ekki lengur í heiminum. Þeir eru í heiminum, en ég kem til þín. Heilagi faðir, varðveit þá í þínu nafni, því nafni, sem þú hefur gefið mér, svo að þeir verði eitt eins og við. -12- Meðan ég var hjá þeim, varðveitti ég þá í nafni þínu, sem þú hefur gefið mér, og gætti þeirra, og enginn þeirra glataðist nema sonur glötunarinnar, svo að ritningin rættist. -13- Nú kem ég til þín. Þetta tala ég í heiminum, til þess að þeir eigi í sjálfum sér fögnuð minn fullkominn. -14- Ég hef gefið þeim orð þitt, og heimurinn hataði þá, af því að þeir eru ekki af heiminum, eins og ég er ekki af heiminum. -15- Ég bið ekki, að þú takir þá úr heiminum, heldur að þú varðveitir þá frá hinu illa. -16- Þeir eru ekki af heiminum, eins og ég er ekki af heiminum. -17- Helga þá í sannleikanum. Þitt orð er sannleikur. -18- Ég hef sent þá í heiminn, eins og þú sendir mig í heiminn. -19- Ég helga mig fyrir þá, svo að þeir séu einnig helgaðir í sannleika. -20- Ég bið ekki einungis fyrir þessum, heldur og fyrir þeim, sem á mig trúa fyrir orð þeirra, -21- að allir séu þeir eitt, eins og þú, faðir, ert í mér og ég í þér, svo séu þeir einnig í okkur, til þess að heimurinn trúi, að þú hefur sent mig. -22- Og ég hef gefið þeim þá dýrð, sem þú gafst mér, svo að þeir séu eitt, eins og við erum eitt, -23- ég í þeim og þú í mér, svo að þeir verði fullkomlega eitt, til þess að heimurinn viti, að þú hefur sent mig og að þú hefur elskað þá, eins og þú hefur elskað mig. -24- Faðir, ég vil að þeir, sem þú gafst mér, séu hjá mér, þar sem ég er, svo að þeir sjái dýrð mína, sem þú hefur gefið mér, af því að þú elskaðir mig fyrir grundvöllun heims. -25- Réttláti faðir, heimurinn þekkir þig ekki, en ég þekki þig, og þessir vita, að þú sendir mig. -26- Ég hef kunngjört þeim nafn þitt og mun kunngjöra, svo að kærleikur þinn, sem þú hefur auðsýnt mér, sé í þeim og ég sé í þeim.

Guð blessi þig – Sigurður Júlíusson

Vissir þú að þú ert staddur í miðju stríði? Þú kannski sérð það ekki, en það breytir þó ekki þeirri staðreynd að í hinu andlega hefur geysað stríð í þúsundir ára og þetta stríð verður alvarlegra með hverju árinu. Það virðist vera að flestir hafi litla eða enga skynjun á að allt í kringum okkur eru andlegar verur með þann eina tilgang að stela, slátra og eyða. Satan hefur með blekkingum afvegaleitt þjóðirnar og látið þær halda að hann sé ekki til. Hans meginmarkið er að fólk glatist og komist ekki til þekkingar á sannleikanum, sem er andstæðan við markmið Guðs sem vill að allir verði hólpnir, en til þess er aðeins ein leið.

Jóh 14:6

Jesús segir við hann: Ég er vegurinn, sannleikurinn og lífið. Enginn kemur til föðurins, nema fyrir mig.

Þegar Guð gekk um á meðal okkar í holdi sem Jesús Kristur, fyrir um 2000 árum var andaheimurinn mun sýnilegri. Illu andarnir töluðu beint við Jesú og sögðu meðal annars; “ert þú kominn að kvelja okkur fyrir tímann?” Andarnir töluðu jafnvel við fólk eins og maður talar við mann. Jesús gaf lærisveinunum vald yfir óhreinum öndum þegar Hann var að þjálfa þá og sagði þeim að fara út tveir og tveir saman. Þeir komu til baka mjög spenntir eftir að hafa æft sig og sögðu frá því hvernig illu andarnir voru þeim undirgefnir. Skoðum nokkur vers þessu til staðfestingar.

Matt 10:1

Og hann kallaði til sín lærisveina sína tólf og gaf þeim vald yfir óhreinum öndum, að þeir gætu rekið þá út og læknað hvers kyns sjúkdóma og veikindi.

Lúk 10:1 & 17

Eftir þetta kvaddi Drottinn til aðra, sjötíu og tvo að tölu, og sendi þá á undan sér, tvo og tvo, í hverja þá borg og stað, sem hann ætlaði sjálfur að koma til.

Nú komu þeir sjötíu og tveir aftur með fögnuði og sögðu: Herra, jafnvel illir andar eru oss undirgefnir í þínu nafni.

Matt 12:43-45

Þegar óhreinn andi fer út af manni, reikar hann um eyðihrjóstur og leitar hælis, en finnur ekki. Þá segir hann: Ég vil hverfa aftur í hús mitt, þaðan sem ég fór. Og er hann kemur og finnur það tómt, sópað og prýtt, fer hann og tekur með sér sjö aðra anda sér verri, og þeir fara inn og setjast þar að, og verður svo hlutur þess manns verri eftir en áður. Eins mun fara fyrir þessari vondu kynslóð.

Við erum í stríði en hvar er barist?

Jesú sagði sjálfur að Hann kom ekki til að færa frið heldur sverð. Það er herkvaðning í gangi og Guð er að leita að sjálfboðaliðum til að berjast trúarinnar góðu báráttu. Áður en barist er í stríði þarf að velja stað þar sem er barist, sameiginlegur vígvöllur þar sem einn mun standa uppi sem sigurvegari. Þessi staður var valinn fyrir óra löngu síðan og hefur ekki breyst. Hugur okkar er vígvöllurinn. Það er þar sem djöfullinn og hans andar skjóta örvum sínum og reyna að fá þig til að taka við þeim, samþykkja þær og bregðast við þeim. Djöfullinn hefur í raun ekkert vald nema það sem þú samþykkir og í raun á það sama við um Guð. Hann gaf þér frjálsan vilja og svo hefst stríðið, ætlar þú að hertaka sérhverja hugsun til hlýðnis við Guð eða ætlar þú að hlýða Satan. Þarna vinnur þú eða tapar stríðinu!

2.Kor 10:3-5

Þótt vér lifum jarðnesku lífi, þá berjumst vér ekki á jarðneskan hátt,  því að vopnin, sem vér berjumst með, eru ekki jarðnesk, heldur máttug vopn Guðs til að brjóta niður vígi. Vér brjótum niður hugsmíðar og allt, sem hreykir sér gegn þekkingunni á Guði, og hertökum hverja hugsun til hlýðni við Krist.

Dæmi um árásir frá hinu illa eru að fá þig til að tala illa um aðra, tala illa um sjálfan þig, vera neikvæður, allar þær hugsanir sem þú bregst við aftur og aftur og framkvæmir verða að vana og ef þú brýtur ekki það hugsanamynstur getur það haft skelfilegar afleiðingar. Hér má nefna ótta, kvíða, neikvæðni, óhollar venjur og allar fíknir. Láttu ekkert ná valdi yfir þér segir Orðið.

Hvernig fáum við vald yfir illum öndum?

Byrjum á því að spyrja okkur hvað er vald? Tökum dæmi um lögreglumann sem er ósköp venjulegur maður i sjálfu sér. Hann hefur ekki styrk í eigin mætti til þess að stöðva til dæmis flutningabíl sem kemur á fullri ferð, en ef hann er í lögreglubúning sem sýnir að hann er hluti af lögreglunni þá snarstöðvar flutningabíllinn við bendingu mannsins, farartæki sem vegur mörg tonn. Það er vegna þess að maðurinn er með umboð og vald frá æðri stofnun, það skiptir ekki máli hvort hann hefur átt slæman dag, brugðist með einhverjum hætti, þegar hann fer til starfa er valdið nákvæmlega eins. Sama á við um hermann, háttsettur hersöfðingi hefur gríðarlega valdamikla stöðu og allir sem eru undir honum í titli og stöðu hlýða honum um leið og skipun berst. Þessi lögmál eru eins í andaheiminum og því andlega stríði sem er í gangi í dag. Hundraðshöfðinginn í Biblíunni skildi þetta.

Matt 8:5-10

Þegar hann kom til Kapernaum, gekk til hans hundraðshöfðingi og bað hann: Herra, sveinn minn liggur heima lami, mjög þungt haldinn. Jesús sagði: Ég kem og lækna hann. Þá sagði hundraðshöfðinginn: Herra, ég er ekki verður þess, að þú gangir inn undir þak mitt. Mæl þú aðeins eitt orð, og mun sveinn minn heill verða. Því að sjálfur er ég maður, sem verð að lúta valdi og ræð yfir hermönnum, og ég segi við einn: Far þú, og hann fer, og við annan: Kom þú, og hann kemur, og við þjón minn: Gjör þetta, og hann gjörir það. -Þegar Jesús heyrði þetta, undraðist hann og mælti við þá, sem fylgdu honum: Sannlega segi ég yður, þvílíka trú hef ég ekki fundið hjá neinum í Ísrael.

Umboð og vald kemur í gegnum samband

Jer 23:32

Ég skal finna spámennina, sem kunngjöra lygadrauma segir Drottinn og segja frá þeim og leiða þjóð mína afvega með lygum sínum og gorti, og þó hefi ég ekki sent þá og ekkert umboð gefið þeim, og þeir gjöra þessari þjóð alls ekkert gagn segir Drottinn.

Guð er almáttugur og veit að ekki öllum er treyst fyrir slíku valdi sem Jesús hafði. Við verðum að vera eins og Jesús til að öðlast þannig vald. Þegar Jesús gekk um jörðina var það til að sýna okkur hvernig fullþroskaður sonur Guðs lýtur út, svo við gætum fetað í Hans fótspor. Orðið segir að Hann var fyrirrennari margra bræðra og þeir sem raunverulega myndu trúa og fara alla leið með því að deyja sjálfum sér, myndu gera sömu verk og jafnvel meiri. Það er til staður í Guði þar sem andarnir skjálfa fyrir þér og geta ekkert annað gert en að flýja þegar þú rekur þá út, en til þess þarf umboð og vald frá Guði. Það sem fæst aðeins með persónulegu sambandi og hlýðni. Margar trúarhetjur sem farið hafa á undan okkur sýndu að þetta er mögulegt og getur þú lesið um nokkrar af þeim hetjum á síðunni. Einnig voru menn á tímum Jesú sem reyndu að kasta út illum öndum í eigin mætti en það fór ekki vel.

Pos 19:-13-17

En nokkrir Gyðingar, er fóru um og frömdu andasæringar, tóku og fyrir að nefna nafn Drottins Jesú yfir þeim, er höfðu illa anda. Þeir sögðu: Ég særi yður við Jesú þann, sem Páll prédikar. Þeir er þetta frömdu, voru sjö synir Gyðings nokkurs, Skeva æðsta prests. En illi andinn sagði við þá: Jesú þekki ég, og Pál kannast ég við, en hverjir eruð þér? Og maðurinn, sem illi andinn var í, flaug á þá, keyrði þá alla undir sig og lék þá svo hart, að þeir flýðu naktir og særðir úr húsinu. Þetta varð kunnugt öllum Efesusbúum, bæði Gyðingum og Grikkjum, og ótta sló á þá alla, og nafn Drottins Jesú varð miklað.

Falskir spámenn forðum daga fóru einnig í eigin mætti en fengu makleg málagjöld villu sinnar og svo mun einnig verða með fálsspámenn í dag sem kenna afbakað Orð Guðs og afvegaleiða fólk frá sannleikanum með táknum, undrum og jafnvel kraftaverkum. Ef boðskapurinn er ekki 100% í samræmi við Orð Guðs þá skaltu ekki taka við því, hversu mikil sem undrin og táknin eru. Satan er blekkingameistari og eitt af hans aðal vopnum er að nota ritningarnar. Hann þurfti aðeins að afbaka eitt orð sem Guð hafði sagt við Evu til að allur heimurinn féll. Djöfullinn setur lygina og blekkinguna í búning sannleikans svo erfitt er að greina á milli. Þegar hann freistaði Jesú í eyðimörkinni sagði hann “Ef þú ert sonur Guðs, þá kasta þér ofan, því að ritað er: Hann mun fela þig englum sínum, og þeir munu bera þig á höndum sér, að þú steytir ekki fót þinn við steini.” Jesús mun segja á hinsta degi aldrei þekkti ég yður víkið frá mér illgjörðamenn.

1. Jóh 3:1 & 5-6

Þér elskaðir, trúið ekki sérhverjum anda, heldur reynið andana, hvort þeir séu frá Guði. Því margir falsspámenn eru farnir út í heiminn.

Falsspámennirnir heyra heiminum til. Þess vegna tala þeir eins og heimurinn talar, og heimurinn hlýðir á þá. Vér heyrum Guði til. Hver sem þekkir Guð hlýðir á oss. Sá sem ekki heyrir Guði til hlýðir ekki á oss. Af þessu þekkjum vér sundur anda sannleikans og anda villunnar.

Matt 24:24

Því að fram munu koma falskristar og falsspámenn, og þeir munu gjöra stór tákn og undur til að leiða afvega jafnvel hina útvöldu, ef orðið gæti.

Baráttan er ekki við menn af holdi og blóði

Þetta verðum við að skilja og við verðum að hafa stjórn á okkur. Við megum ekki berjast í eigin mætti við menn eða rjúka upp í reiði þegar við verðum fyrir mótlæti. Hugsaðu alltaf, hvað er raunverulega á bakvið. Óvinurinn notar alla sem hann getur, okkar nánustu, utanaðkomandi aðila, vini, óvini. Hvern sem hann nær valdi yfir með því að skjóta inn hugsunum sem viðkomandi bregst við og framkvæmir í stað þess að taka vald yfir og brjóta niður. Við sigrum aðeins með bæn, visku frá Guði, kærleika, miskunnsemi, auðmýkt og stundum þarf föstu til.

Matt 17:19-21

Þá komu lærisveinarnir til Jesú og spurðu hann einslega: Hvers vegna gátum vér ekki rekið hann út? Hann svaraði þeim: Vegna þess að yður skortir trú. Sannlega segi ég yður: Ef þér hafið trú eins og mustarðskorn, getið þér sagt við fjall þetta: Flyt þig héðan og þangað, og það mun flytja sig. Ekkert verður yður um megn. En þetta kyn verður eigi út rekið nema með bæn og föstu.

Talað er um að það taki 21 dag eða þrjár vikur að brjóta hugsanamunstur. Í dag er búið að rannsaka hvernig heilinn í okkur virkar og er t.d. öll markaðssetning byggð á sálfræði í dag og hvernig við bregðumst við, samfélagsmiðlar, tölvuleikir og fleira er hannað til að skapa fíkn og fá þig til að ánetjast. Hvað er í fyrsta sæti í þínu lífi og fær mest af tíma þínum, er það Guð og áætlun Hans með líf þitt eða eitthvað annað.

Stríðið er raunverulegt og þú hefur val í dag til þess að taka þína stöðu. Fyrsta skrefið er að taka við Jesú kristi ef þú hefur ekki gert það. Næsta skref er taka þér þína stöðu, lesa Orðið og læra á þau verkfæri sem Guð hefur gefið okkur til að sigra. Því næst fara út að æfa þig með öðrum trúuðum, gera köllun þína og útvalning vissa.

Átt þú lifandi trú á Jesú Krist?

Ef ekki hvet ég þig til að fara með þessa bæn og vertu svo í sambandi við okkur ef þú vilt eiga samfélag við aðra trúaða.

“Ég trúi því að Jesús Kristur hafi dáið fyrir mig og að hann hafi risið upp frá dauðum. Jesús ég bið þig um að koma inn í hjarta mitt á þessu augnabliki og frelsa mig frá syndum mínum. Jesús ég býð þig velkominn inn í líf mitt og ég bið þig um að leiða mig héðan í frá. Ég bið þig að fylla mig af anda þínum, Heilagi Faðir, ég þakka þér að ég er nú þitt barn.”

Guð blessi þig – Sigurður Júlíusson